Once

Den jordnære historia og den upolerte musikken i Once har bergtatt publikum og treft dei midt i hjartet der den har blitt spelt. Musikken spelar sjølve hovudrolla i denne musikalen, som handlar om musikkens kraft i møtet mellom to kvardagsmenneske.

Once er ein litt annleis musikal, der musikken har ein naturleg plass og kjem til live framfor auga til publikum. Vi møter Han, som har mista trua på både musikken og kjærleiken. Til dagleg jobbar han på farens støvsugarverkstad, men dagane er monotone. Mesteparten av tida tenkjer han på eksen. Ein dag Han står på gata i heimbyen Dublin og spelar ei låt han har skrive til henne, kjem aleinemora Ho forbi. Ho blir fullstendig trollbunden av låta han spelar, og møtet dei imellom gir lysta tilbake på både musikken, kjærleiken og livet. Med det kvervlar dei to inn i eit musikalsk kjærleikseventyr der dei uttrykker alt dei ikkje kan seie til kvarandre gjennom irskinspirert folkrock.